ഷോൺ അറക്കപ്പറമ്പിൽ യു.എസ്.എ U-17 വോളിബോൾ ടീമിലേക്ക് തിരഞ്ഞെടുക്കപ്പെട്ടു
ചിക്കാഗോ: മൗണ്ട് പ്രോസ്പെക്റ്റിൽ സ്ഥിരതാമസമാക്കിയിരിക്കുന്ന ചിക്കാഗോ സെൻറ് മേരീസ് ക്നാനായ കത്തോലിക്ക ദേവാലയ ഇടവകാംഗവും ഞീഴൂർ അറക്കപ്പറമ്പിൽ സനീഷ് അനീറ്റ ദമ്പതികളുടെ
മകനുമായ ഷോൺ ജോൺ, യു.എസ്.എ U-17 വോളിബോൾ ടീമിലേക്ക് തെരഞ്ഞെടുക്കപ്പെട്ടിരിക്കുന്നു. ഇതോടെ രാജ്യത്തെ ഏറ്റവും പ്രതീക്ഷയുള്ള യുവ താരങ്ങളിൽ ഒരാളായി ഷോൺ ഇടം നേടിയിരിക്കുന്നു.
നവംബർ 9-ന്, ഷോൺ കൊളറാഡോ സ്പ്രിംഗ്സിലെ ഒളിമ്പിക് ആൻഡ് പാര ഒളിമ്പിക് ട്രെയിനിംഗ് സെന്ററിലേക്കാണ് പരിശീലനത്തിനായി പോകുന്നത്. ഫൈനൽ ടീമിലേക്കുതെരഞ്ഞെടുക്കപ്പെടുകയാണെങ്കിൽ, നവംബർ 18 മുതൽ 23 വരെ നിക്കാരാഗ്വയിലെ മനാഗ്വയിൽ നടക്കുന്ന NORCECA ബോയ്സ് U17 കോൺടിനെന്റൽ ചാമ്പ്യൻഷിപ്പിൽ അമേരിക്കയെ ഷോൺ പ്രതിനിധീകരിക്കും.
ചിക്കാഗോ KCYLഅംഗമായ ഷോൺ ജോണിന്റെ വോളിബോൾ യാത്ര ആരംഭിച്ചത് 2022-ൽ KCS ചിക്കാഗോ ആരംഭിച്ച ബോയ്സ് ആൻഡ് ഗേൾസ് ക്യാമ്പിലൂടെയായിരുന്നു. അവന്റെ കഴിവ് ഉടൻ തന്നെ തെളിഞ്ഞു, അതിലൂടെ റിവർ ട്രെയിൽസ് മിഡിൽ സ്കൂൾ ടീമിനെ തുടർച്ചയായി രണ്ട് വർഷം അജയ്യരാക്കി, തുടർന്ന് സെവൻത് ഗ്രേഡിലും 8ത് ഗ്രേഡിലും സ്കൂളിന് ആദ്യമായി കോൺഫറൻസ് ചാമ്പ്യൻഷിപ്പ് നേടിക്കൊടുക്കുകയും ചെയ്തു.
2023-ൽ, ഷോൺ ഒരു പ്രമുഖ ക്ലബ് ടീമിൽ ( Mod Vollyball club , Northbrook) ചേർന്നു, അവരുടെ എലിറ്റ് ടീമിൽ സ്ഥാനം നേടി. 2025 ജൂലൈയിൽ ഫ്ലോറിഡയിലെ ഓർലാൻഡോയിൽ നടന്ന AAU നാഷണൽ ക്ലബ് വോളിബോൾ ചാമ്പ്യൻഷിപ്പിൽ മൂന്നാം സ്ഥാനം നേടിയത് അദ്ദേഹത്തിന്റെ ക്ലബ് കരിയറിലെ പ്രധാന നേട്ടങ്ങളിലൊന്നായിരുന്നു.
ഹൈസ്കൂൾ തലത്തിലും ഷോൺ മികച്ച പ്രകടനം കാഴ്ചവെച്ചു. ആർലിംഗ്ടൺ ഹൈറ്റ്സിലെ ജോൺ ഹെർസി ഹൈസ്കൂളിലെ ഫസ്റ്റ് ഇയർ വിദ്യാർത്ഥിയായിട്ടും അദ്ദേഹം വാർസിറ്റി ടീമിലേക്കു തെരഞ്ഞെടുക്കപ്പെട്ടു, അതീവ അപൂർവമായൊരു ബഹുമതി. 2024–2025 അധ്യായന വർഷത്തിൽ ടീം ഇലിനോയിസ് സ്റ്റേറ്റ് സെക്ഷണൽ ചാമ്പ്യന്മാരായി മാറി.
ഷോൺ്റെ സമർപ്പണവും പരിശ്രമവും യു.എസ്.എ വോളിബോൾയുടെ ശ്രദ്ധ നേടാൻ കാരണമായി. അതിന്റെ ഭാഗമായി, 2025 മാർച്ചിലും സെപ്റ്റംബറിലും കൊളറാഡോ സ്പ്രിംഗ്സിൽ നടന്ന നാഷണൽ ഡെവലപ്മെന്റ് ട്രെയിനിംഗ് പ്രോഗ്രാമിലേക്കും (NTDP) അദ്ദേഹത്തെ ക്ഷണിച്ചു. കൂടാതെ 2025 , December (അനഹൈം, കാലിഫോർണിയ), 2026 March (കൊളറാഡോ സ്പ്രിംഗ്സ്) നടക്കുന്ന NTDP ക്യാമ്പുകളിലും പങ്കെടുക്കാൻ ഷോൺ തെരഞ്ഞെടുക്കപ്പെട്ടിട്ടുണ്ട്.
തന്റെ നേട്ടത്തെ കുറിച്ച് ഷോൺ പറഞ്ഞു:
“യു.എസ്.എയുടെ ജേഴ്സി ധരിക്കുന്നത് എനിക്ക് ഒരു സ്വപ്നം സത്യമായതുപോലെ തോന്നുന്നു. വോളിബോൾ ആദ്യം കളിച്ച നാൾ മുതൽ ഞാൻ ഇതിനെക്കുറിച്ച് സ്വപ്നം കണ്ടിരുന്നു. എന്നിൽ വിശ്വാസം വെച്ച് എപ്പോഴും പിന്തുണച്ച എന്റെ പരിശീലകർക്കും കൂട്ടുകാർക്കും കുടുംബത്തിനും ഞാൻ ഹൃദയത്തിന്റെ ആഴത്തിൽ നിന്ന് നന്ദിയുണ്ട്. ഞാൻ എന്റെ മുഴുവൻ മനസും ശക്തിയും സമർപ്പിച്ച് മികച്ചത് ചെയ്യാൻ ആഗ്രഹിക്കുന്നു.”
