കോട്ടയം: ഭിന്നശേഷിയുള്ളവരുടെ സമഗ്ര ഉന്നമനം ലക്ഷ്യമാക്കി കോട്ടയം അതിരൂപതയുടെ സാമൂഹ്യ സേവന വിഭാഗമായ കോട്ടയം സോഷ്യല് സര്വ്വീസ് സൊസൈറ്റി നടപ്പിലാക്കി വരുന്ന സമൂഹാധിഷ്ഠിത പുനരധിവാസ പദ്ധതിയുടെ ഭാഗമായി അവശ്യമരുന്നുകള് വിതരണം ചെയ്തു. കാരുണ്യദൂത് എന്ന പേരില് നടപ്പിലാക്കുന്ന പദ്ധതിയുടെ ഭാഗമായുള്ള അവശ്യമരുന്നുകളുടെ വിതരണോദ്ഘാടനം തെള്ളകം ചൈതന്യയില് ഏറ്റുമാനൂര് ബ്ലോക്ക് പഞ്ചായത്ത് പ്രസിഡന്റ് ജെയ്മോന് കരീമഠം നിര്വ്വഹിച്ചു. ഏറ്റുമാനൂര് മുനിസിപ്പാലിറ്റി കൗണ്സിലര് ലൗലി ജോര്ജ്ജ് ചടങ്ങില് അദ്ധ്യക്ഷത വഹിച്ചു, കെ.എസ്.എസ്.എസ് കോര്ഡിനേറ്റര് മേരി ഫിലിപ്പ്, സ്പെഷ്യല് എജ്യൂക്കേറ്റര് സിസ്റ്റര് അജോ ഡിസിപിബി, സിബിആര് സന്നദ്ധ പ്രവര്ത്തക ഷിജി ബെന്നി എന്നിവര് ചടങ്ങില് സന്നിഹിതരായിരുന്നു. കോട്ടയം, എറണാകുളം ജില്ലകളിലെ ഭിന്നശേഷിയുള്ള വ്യക്തികള്ക്കാണ് അവശ്യമരുന്നുകള് വിതരണം ചെയ്തത്.
