ചിക്കാഗോ: നോർത്ത് അമേരിക്കയിലെ ക്നാനായ കത്തോലിക്കാ സമൂഹത്തിന്റെ ഏറ്റവും വലിയ സംഗമമായ കെ.സി.സി.എൻ.എ. കൺവെൻഷന്റെ 16-ാമത് പതിപ്പിന് ഫ്ലോറിഡയിലെ ഫോർട്ട് ലോഡർഡെയിൽ വേദിയാകും. 2026 ഓഗസ്റ്റ് 6 മുതൽ 10 വരെ ഫോർട്ട് ലോഡർഡെയിലെ ബ്രോവാർഡ് കൗണ്ടി കൺവെൻഷൻ സെന്ററിൽ വെച്ച് കൺവെൻഷൻ നടക്കും. ചിക്കാഗോയിൽ വെച്ച് നടന്ന ക്നാനായ കത്തോലിക്ക കോൺഗ്രസ് ഓഫ് നോർത്ത് അമേരിക്ക (KCCNA) നാഷണൽ കൗൺസിൽ യോഗത്തിലാണ് ഈ പ്രഖ്യാപനം നടന്നത്. കെ.സി.സി.എൻ.എ. പ്രസിഡന്റ് ജെയിംസ് ഇല്ലിക്കൽ, ജനറൽ സെക്രട്ടറി വിപിൻ ചാലുങ്കൽ എന്നിവർ ഇക്കാര്യം അറിയിച്ചു. കൺവെൻഷനിൽ പങ്കെടുക്കുന്നവർക്കായി ഫോർട്ട് ലോഡർഡെയിലെ പുതിയ ഹോട്ടൽ സമുച്ചയമായ ഓമ്നി ഹോട്ടലിൽ താമസസൗകര്യം ഒരുക്കും. അമേരിക്കയിൽ നിന്നും കാനഡയിൽ നിന്നുമുള്ള ആയിരക്കണക്കിന് ക്നാനായ കുടുംബങ്ങളെ ഒരുമിപ്പിക്കാൻ മഹാസംഗമം ലക്ഷ്യമിടുന്നു. ടാമ്പാ, മയാമി ക്നാനായ കത്തോലിക്ക അസോസിയേഷനുകളാണ് കൺവെൻഷന് സംയുക്തമായി ആതിഥേയത്വം വഹിക്കുന്നത്. 2012-ലെ ടാമ്പാ കൺവെൻഷന് ശേഷം ഫ്ലോറിഡ വീണ്ടും വേദിയാകുന്നു എന്നതാണ് പ്രത്യേകത. ദക്ഷിണ ഫ്ലോറിഡയിലെ ക്നാനായ സമൂഹം ആദ്യമായാണ് ഇത്ര വലിയൊരു സമ്മേളനത്തിന് ആതിഥേയത്വം വഹിക്കുന്നത്. കൺവെൻഷൻ ലൊക്കേഷന്റെ വിശദാംശങ്ങൾ കെ.സി.സി.സി.എഫ്. പ്രസിഡന്റ് ജയ്മോൾ മൂശാരിപ്പറമ്പിൽ, ടാമ്പാ ആർ.വി.പി. ജോബി ഊരാളിൽ, അറ്റലാന്റ-മയാമി ആർ.വി.പി. അരുൺ പൗവത്തിൽ എന്നിവർ നാഷണൽ കൗൺസിൽ യോഗത്തിൽ അവതരിപ്പിച്ചു.വിശുദ്ധ കുർബാന, യുവജന-ശിശു പരിപാടികൾ, നേതൃസമ്മേളനങ്ങൾ, സെമിനാറുകൾ, സാംസ്കാരിക മേളകൾ, കലാ-കായിക മത്സരങ്ങൾ എന്നിവ ഉൾപ്പെടെയുള്ള വിപുലമായ പരിപാടികളാണ് കൺവെൻഷനിൽ സംഘടിപ്പിക്കുക. ക്നാനായ പാരമ്പര്യം ഉയർത്തിപ്പിടിക്കുന്ന കലാപരിപാടികളും ഉണ്ടാകും.
“16-ാമത് കെ.സി.സി.എൻ.എ. കൺവെൻഷൻ വെറുമൊരു സംഗമം മാത്രമല്ല, നമ്മുടെ സമുദായ പാരമ്പര്യത്തിന്റെയും ബന്ധങ്ങളുടെയും മഹോത്സവം കൂടിയാണ്,” കെ.സി.സി.എൻ.എ. എക്സിക്യൂട്ടീവ് കമ്മറ്റി അറിയിച്ചു. മികച്ച സൗകര്യങ്ങളും തന്ത്രപ്രധാനമായ സ്ഥലവുമുള്ള ബ്രോവാർഡ് കൗണ്ടി കൺവെൻഷൻ സെന്റർ, ലോകത്തിലെ ഏറ്റവും വലിയ ക്നാനായ സംഗമങ്ങളിൽ ഒന്നിന് അനുയോജ്യമായ അന്തരീക്ഷം ഒരുക്കും. രജിസ്ട്രേഷൻ, താമസം, പരിപാടികളുടെ വിശദാംശങ്ങൾ എന്നിവ ഉടൻ അറിയിക്കുമെന്ന് എക്സിക്യൂട്ടീവ് കമ്മിറ്റി കൂട്ടിച്ചേർത്തു. ജെയിംസ് ഇല്ലിക്കൽ (ഫ്ളോറിഡ) പ്രസിഡണ്ട് , സിജു ചെരുവൻകാലായിൽ (ന്യൂയോർക്ക് ) എക്സിക്യൂട്ടീവ് വൈസ് പ്രസിഡണ്ട് , വിപിൻ ചാലുങ്കൽ (ചിക്കാഗോ) ജനറൽ സെക്രട്ടറി, സൂസൻ തെങ്ങുംതറയിൽ (സാൻ ഹൊസെ) ജോയിന്റ് സെക്രട്ടറി, ജോജോ തറയിൽ (ഹൂസ്റ്റൺ) ട്രഷറർ, ജേക്കബ് കുസുമാലയം(ന്യൂ യോർക്ക്) വൈസ് പ്രസിഡണ്ട് ജെസ്നി കൊട്ടിയാനിക്കൽ (അറ്റലാന്റ) ജോയിന്റ് ട്രെഷറർ എന്നിവരാണ് KCCNA യ്ക്ക് നേതൃത്വം നൽകുന്നത് .ഇവരെ കൂടാതെ റീജിയണൽ വൈസ്സ് പ്രസിഡണ്ടുമാരായ ഫിലിപ്സ് മാത്യു മാപ്പളശേരിൽ (ഹൂസ്റ്റൺ), അരുൺ ജോർജ് പൗവ്വത്തിൽ (മയാമി ), സിൽവസ്റ്റർ സിറിയക്ക് കൊടുന്നിനാംകുന്നേൽ (ഡാളസ്), ബാബു തൈപ്പറമ്പിൽ (ചിക്കാഗോ), സജി ജോസഫ് ഒരപ്പാങ്കൽ (ന്യൂയോർക്ക് ), ഗോഡ്വിൻ കൊച്ചുപുരക്കൽ (മിനസോട്ട), ടോമി ജോസഫ് തെക്കനാട്ട് (വാഷിംഗ്ടൺ ), ജോ മാനുവൽ മരങ്ങാട്ടിൽ (സാക്രമെന്റോ ), ജോബി ഫിലിപ്പ് ഊരാളിൽ (ഫ്ലോറിഡ), മിന്നു എബ്രഹാം കൊടുന്നിനംകുന്നേൽ (കാനഡ) , വിമൻസ് ഫോറം നാഷണൽ പ്രസിഡണ്ട് ഡാനി പല്ലാട്ടുമഠം (ഡാളസ്), KCYL പ്രസിഡണ്ട് ആൽവിൻ പിണർക്കയിൽ (ചിക്കാഗോ) , യുവജനവേദി നാഷണൽ പ്രസിഡണ്ട് പുന്നൂസ് വഞ്ചിപുരക്കൽ (ടാമ്പ), സ്പിരിച്യുൽ ഡയറക്ടർ റെവ. ഫാ.ബോബൻ വട്ടംപുറത്ത് (സാൻ അന്റോണിയ വികാരി) എന്നിവരടങ്ങിയതാണ് കെ.സി.സി.എൻ.എ എക്സിക്യൂട്ടീവ് കമ്മറ്റി .
