കോട്ടയം: സ്വയം തൊഴില് സംരംഭകത്വ പദ്ധതികളിലൂടെ സ്വയപര്യാപ്തതയ്ക്ക് അവസരം ഒരുക്കുക എന്ന ലക്ഷ്യത്തോടെ കോട്ടയം അതിരൂപതയുടെ സാമൂഹ്യ സേവന വിഭാഗമായ കോട്ടയം സോഷ്യല് സര്വ്വീസ് സൊസൈറ്റിയുടെ നേതൃത്വത്തില് വിഭാവനം ചെയ്ത് നടപ്പിലാക്കുന്ന തയ്യല് മിത്രാ പദ്ധതിയുടെ ഭാഗമായി തയ്യല് മെഷീന് യൂണിറ്റുകള് വിതരണം ചെയ്തു. തെള്ളകം ചൈതന്യയില് സംഘടിപ്പിച്ച ചടങ്ങില് തയ്യല് മെഷീന് യൂണിറ്റുകളുടെ വിതരണോദ്ഘാടനം തിരുവഞ്ചൂര് രാധാകൃഷണന് എം.എല്.എ നിര്വ്വഹിച്ചു. ഉപവരുമാന സാധ്യതകളോടൊപ്പം സ്ത്രീ ശാക്തീകരണ പ്രവര്ത്തനങ്ങള്ക്കും തയ്യല് മെഷീന് യൂണിറ്റുകള് ഉള്പ്പെടെയുള്ള വരുമാന സംരംഭകത്വ പ്രവര്ത്തനങ്ങളിലൂടെ സാധിക്കുമെന്ന് അദ്ദേഹം ഉദ്ഘാടന പ്രസംഗത്തില് പറഞ്ഞു. സ്ത്രീ ശാക്തീകരണ പ്രവര്ത്തനങ്ങളില് കെ.എസ്.എസ്.എസ് നടപ്പിലാക്കി വരുന്ന പ്രവര്ത്തനങ്ങള് മാതൃകാ പരമാണെന്നും അദ്ദേഹം കൂട്ടിച്ചേര്ത്തു. ഏറ്റുമാനൂര് ബ്ലോക്ക് പഞ്ചായത്ത് പ്രസിഡന്റ് ജയ്മോന് കരീമഠം ചടങ്ങില് അദ്ധ്യക്ഷത വഹിച്ചു. കോട്ടയം സോഷ്യല് സര്വ്വീസ് സൊസൈറ്റി എക്സിക്യൂട്ടീവ് ഡയറക്ടര് ഫാ. സുനില് പെരുമാനൂര്, പ്രോഗ്രാം ഓഫീസര് സിജോ തോമസ് എന്നിവര് പ്രസംഗിച്ചു. പദ്ധതിയുടെ ഭാഗമായി ഉഷ കമ്പനിയുടെ ബന്ധന് കോംപോസിറ്റ് മോഡല് തയ്യല് മെഷീന് യൂണിറ്റുകളാണ് വിതരണം ചെയ്തത്.
